أذكر لما كنا في سنة أولى ، في مادة البيولوجي ( الأحياء ) بالتحديد ، دخلنا على باب الغدد الصماء ، بدأ الدكتور في المحاضرة الأولى وأعطانا نبذة عن الهرمونات ، أذكر أنه ( ما كان رايق ) في تلك المحاضرة ؛ ولذلك .. تكلم بشكل عام دون تفصيل عن أنواع الغدد وعن أشكال الريسبترز والمستقبلات لها .

على أي حال … المحاضرة الثانية ( من بكره ) أراد الدكتور يتكلم عن الغدد بتوسع وجعل يناقش الطلاب ، وسأل سؤالاً يريد به فتح النقاش .. ماهي الغدة المتحكمة في غدد جسم الانسان بشكل عام … ؟

اختلف العلماء – أقصد الطلاب في المسألة … فمنهم من يقول الدرقية ومنهم من يقول النخامية ( طبعاً كنا نقولها بالعربي لسه سنة أولى ) قال الدكتور ( لا زم تاخذون جو إنه قاعد يتكلم مصري الآن ! ) :
الجواب الصحيح هو النخامية اللي اسمها بيتيوتري ( Pituitary Gland ) ، لكن مش هي كل حاجة ، في عضو صغير جداً في الدماغ بيسموه الهايبوسلمس هو اللي بيتحكم في البيتيوتري ( Pituitary ) !
( الحقيقة هي أن اسمه هايبوثلمس ( hypothalamus ) وليس هايبوسلمس )

المهم … بدأ الدكتور يشرح ، والهايبوسلمس فيها والهايبوسلمس ما فيها ، والهايبوسلمس تسوي والهايبوسلمس ما تسوي ، وحنا داخلين معه جو ، بعد كذا صاد الدكتور طالب يلعب بالجوال … قال له وقف … ثم سأله سؤالاً ليبهته ويحعله يسقط في يده .. فقال : إيه هو العضو في الجسم اللي بيتحكم في كل الغدد وخصوصاً في غدة البيتيوتري ( Pituitary ) ؟؟

الطالب سكت شوي بعدين قال : الهايبوسلمس !!

تغير وجه الدكتور ثم قال : انته بتهزر ؟!! ايه يعني هايبوسلمس ؟!!

مرت لحظة صمت طويلة بعد صرخة الدكتور وصار الجميع يترقب الموقف ، الطالب استحى شوي بعدين شد حيله وتكلم بكل براءة وقال : آسف دكتور .. بس طول المحاضرة أنا أسمعك تتكلم عن الهايبوسلمس قلت أكيد هي الجواب الصحيح !!
( مسكين .. على باله الدكتور مدقر على الجواب ما يدري إن المشكلة شي ثاني )

طأطأ الدكتور رأسه وهو يضحك وقال : برضوه !!
بعدين قام وكتبها على السبورة البيضاء .. وقال : ” اسمها Hypothalamus ( هايبوسلمس ) … بالساء وليس بالساء” ( طلعوا لي الفرق بالله عليكم !! )

الحمد لله إننا عرفنها لما سألنا زملاءنا الأكبر سناً … ولا كان إلى الآن اسمها هايبوسلمس ، لأن اللي درسنا تشريح مصري ويقول : هايبوسلمس !! واللي يدرسنا فيسيولجي في الإيندو كراين ( الهرمونات ) مصري ويقول : هايبوسلمس !! واللي درسنا هيستو ( أنسجة ) مصري ويقول : هايبوسلمس !! واللي درسنا إمبريو ( أجنة وارحام ) مصري ويقول : هايبوسلمس !! واللي درسنا باثو ( أمراض ) مصري ويقول : هايبوسلمس !! واللي درسنا فارما ( أدوية ) مصري ويقول : هايبوسلمس !! صراحة … حتى لما قريتها من الكتاب بعد أول محاضرة في البايولوجي ( الأحياء ) حسبت لها بروناونسيشن خاص وهو الهايبوسلمس !!

لكن أبشركم .. عرفنا معناها الآن ولا كان علوووووووووم !